የፌደራል ከፍተኛ ፍርድ ቤት ልደታ ምድብ ችሎት፣ በሕዝብ ተወካዮች ምክር ቤት አባል በሆኑት አቶ ክርስቲያን ታደለ እና በአማራ ክልል ምክር ቤት አባል አቶ ዮሐንስ ቧያለው ላይ ዛሬ ሊሰጥ የነበረውን ብይን ለሌላ ጊዜ ማዛወሩ ተገለጠ። ፍርድ ቤቱ ብይኑን ለመስጠት ለሐምሌ 3 ቀን 2018 ዓ.ም ተለዋጭ ቀጠሮ መስጠቱን ሸገር ዘግቧል።
ተከሳሾቹ ቀደም ሲል በማረሚያ ቤት ውስጥ የሕክምና አገልግሎት የማግኘት መብታቸው እንዳልተከበረ፣ እንዲሁም በቤተሰብ የመጎብኘት ሰብአዊ መብታቸው መጣሱን በመጥቀስ ለፍርድ ቤቱ አቤቱታ አቅርበው ነበር። ይህንን ተከትሎ የፌደራል ማረሚያ ቤት ኃላፊዎች ዛሬ ለችሎቱ ምላሽ መስጠታቸውን የደረሰን ዘገባ ያመላክታል።
የማረሚያ ቤቱ ኃላፊዎች በሰጡት ምላሽ፣ ተከሳሾቹ ያቀረቧቸውንና ያጋጠሟቸውን ችግሮች በሙሉ መፍታታቸውን ለችሎቱ በማስረዳት ክርክር አቅርበዋል። ሆኖም ግን ተከሳሾቹ በበኩላቸው የተጠቀሱት ችግሮች አሁንም ድረስ እንዳልተፈቱና መብቶቻቸው እየተጣሱ መሆኑን ለችሎቱ በድጋሚ ተናግረዋል።
ችሎቱ በጉዳዩ ላይ ተከሳሾቹ ያቀረቧቸው ጥያቄዎች ከማረሚያ ቤቱ አቅም በላይ እንዳልሆኑ በመግለጽ፣ የማረሚያ ቤቱ ኃላፊዎች የቀሩትን ችግሮች በአስቸኳይ እና በቅንነት እንዲፈቱ ጥብቅ ትእዛዝ ሰጥቷል። ፍርድ ቤቱ በጉዳዩ ላይ የመጨረሻ ብይን ለመስጠት ለሰኔ 22 ቀን 2018 ዓ.ም ተለዋጭ ቀጠሮ መያዙን የደረሰን ዘገባ ያረጋግጣል።
