የኢትዮጵያ ገንዘብ ሚኒስትር አቶ አህመድ ሽዴ፣ ዓለም አቀፍ አጋሮችና የፋይናንስ ተቋማት ለታዳጊ አገራት የነዳጅና ማዳበሪያ መግዣ እንዲሁም ለአነስተኛ አርሶ አደሮች መደጎሚያ የሚሆን አስቸኳይ የገንዘብ ድጋፍ እንዲያደርጉ ጥሪ አቀረቡ።

ሚኒስትሩ ይህንን ጥሪ ያቀረቡት ትናንት በለንደን በተካሄደው የግሎባል ፓርትነርሺፕ ኮንፈረንስ (Global Partnership Conference) ላይ ተገኝተው ባደረጉት ንግግር መሆኑን በለንደን የሚገኘው የኢትዮጵያ ኤምባሲ አስታውቋል።

​ሚኒስትር አህመድ ሽዴ በመካከለኛው ምስራቅ እየተካሄደ ባለው ጦርነት ሳቢያ በዓለም አቀፍ ደረጃ የተፈጠረው የማዳበሪያ አቅርቦት ማሽቆልቆል እና የምርት ወጪዎች መጨመር ታዳጊ አገራትን ክፉኛ እየጎዳ መሆኑን ገልጸዋል። ይህ ተግዳሮት በተለይም እንደ ኢትዮጵያ ባሉ አገራት ላይ የሚከተሉትን ከፍተኛ ስጋቶች እንደሚደቅን አስገንዝበዋል፦

​የምርታማነት መቀነስ፦ የማዳበሪያ አቅርቦት መስተጓጎል እና የዋጋ መናር አርሶ አደሩ ምርቱን በአግባቡ እንዳያመርት ማነቆ ሆኗል።

​የምግብ ዋስትና መሸርሸር፦ የግብርና ምርታማነት መውረድ በቀጥታ በዜጎች የምግብ ዋስትና ላይ ከፍተኛ አደጋ እየደቀነ ይገኛል።

​የገንዘብ ሚኒስትሩ በንግግራቸው ወቅት የሆርሙዝ ወሽመጥ መዘጋት በዓለም አቀፉ የንግድ መስመር ላይ ያስከተለውን ቀውስ በዝርዝር አብራርተዋል። የወሽመጡ መዘጋት የነዳጅ ዋጋ በከፍተኛ ደረጃ እንዲንር ማድረጉን የጠቀሱት አቶ አህመድ ሽዴ፣ ይህም ሰንሰለታማ የኢኮኖሚ ጫናዎችን መፍጠሩን አስረድተዋል።

​የነዳጅ ዋጋ መናር ያስከተላቸው ዋና ዋና ቀውሶች፦ ​የትራንስፖርት እና የሎጂስቲክስ ወጪዎች በከፍተኛ ሁኔታ መጨመር; ለመስኖ ልማት እና ለግብርና ማቀነባበሪያ; ኢንዱስትሪዎች የሚወጣው ወጪ መናር እና የምግብ ምርቶች ሥርጭት ሂደት መጓተት እና የዋጋ ግሽበት መፈጠሩ የሚሉት ይጠቀሳል።

​አቶ አህመድ ሽዴ አሁን ያለውን ጊዜያዊ ቀውስ ከመቋቋም ባለፈ ዘላቂ መፍትሔዎችን ማምጣት እንደሚገባ አጽንዖት ሰጥተዋል። በተለይም በቀጠናዊ የአቅርቦት ሰንሰለቶች፣ በትላልቅ መጋዘኖች ግንባታ እና በሎጂስቲክስ መሠረተ ልማቶች ላይ የረጅም ጊዜ ኢንቨስትመንት ሊፈስባቸው እንደሚገባና ይህም የአገራትን የመቋቋም አቅም እንደሚያሳድግ ጠቅሰዋል።

​በመጨረሻም ሚኒስትሩ በዓለም አቀፍ ደረጃ የሚሰጠው ሰብዓዊ እርዳታ አሰጣጥ ላይ መዋቅራዊ ለውጥ ያስፈልጋል ብለዋል። ሰብዓዊ እርዳታ ዘላቂነት ከሌለውና ጥገኝነትን ከመፍጠር አዙሪት ወጥቶ፣ ከአገራዊ ሥርዓቶች እና አገራት ቅድሚያ ከሚሰጧቸው የልማት አጀንዳዎች ጋር መጣጣም እንዳለበት በጥብቅ አሳስበዋል።