የመንግስትን አሰራር ግልጽነት ለማረጋገጥ እና የዜጎችን መረጃ የማግኘት መብት ለመጠበቅ የተዘጋጀው አዲሱ "የመረጃ ነፃነት ረቂቅ አዋጅ" ራሱ መረጃን በከለከለ ሁኔታ ውይይት ተደረገበት። የህዝብ ተወካዮች ምክር ቤት "የህዝብ ይፋዊ ውይይት" በሚል በጠራው በዚህ መድረክ ላይ የተመረጡ ግለሰቦች ብቻ እንዲገኙ የተደረገ ሲሆን፣ ጋዜጠኞችም በስብሰባው ላይ ዘገባ እንዳይሰሩ መታገዳቸው ታውቋል።

ግንቦት 5 ቀን 2018 ዓ.ም. በምክር ቤቱ የዴሞክራሲ ጉዳዮች ቋሚ ኮሚቴ የተዘጋጀው ይህ ውይይት፣ ስያሜው የህዝብ ቢሆንም አፈጻጸሙ ግን "ከህዝብ እይታ የራቀ" እንደነበር ምንጮች ገልጸዋል። በተለይም በመድረኩ የተገኙ ጥቂት የሚዲያ ባለሙያዎች ውይይቱን በድምጽም ሆነ በምስል እንዳይቀርጹ ጥብቅ ክልከላ ተጥሎባቸዋል። ባለሙያዎቹ የተገኙት "በታዳሚነት" እንጂ በጋዜጠኝነት ሙያቸው ዘገባ ለመስራት እንዳልሆነ ተነግሯቸዋል። ከግል ሚዲያዎችም ኢቢኤስ (EBS) ብቻ ተጋብዞ እንደነበር ተመልክቷል።

ይህ ክልከላ የተፈጸመው ረቂቅ አዋጁ ከመንግስት አሰራር ላይ "የሚስጥራዊነት ባህልን" ለመስበር የወጣ መሆኑ በተነገረበት መድረክ ላይ መሆኑ ትልቅ ተቃርኖ ፈጥሯል። ረቂቅ አዋጁ ያስፈለገበት ዋነኛ ምክንያት የመንግስት አካላት መረጃን የመደበቅ ባህል በማስወገድ ግልጽነትን ለማስፈን እንደሆነ በማብራሪያ ሰነዱ ላይ ሰፍሯል። ሰነዱ አክሎም የቀድሞው አዋጅ ቁጥር 590/2000 ያልተገበረው የመንግስት አካላት "መልካም ገጽታ የሚገነባው መረጃ በመደበቅ ነው" የሚል የተሳሳተ አመለካከት በመያዛቸው እንደሆነ ይገልጻል።

ይሁን እንጂ "ሚስጥራዊነትን እንስበር" የሚል ማብራሪያ የያዘውን አዋጅ ራሱ ምክር ቤቱ በሚስጥር እና በቅድመ-ምዝገባ በተመረጡ ሰዎች ብቻ መወያየቱ አግራሞትን ፈጥሯል። በተለምዶ የህዝብ ውይይት ማንኛውም ዜጋ እና የሚዲያ ተቋም በነጻነት የሚሳተፍበት መሆን ሲገባው፣ የዚህ ረቂቅ አዋጅ ውይይት ግን በቁጥጥር ስር መዋሉ ተገልጿል።

በመድረኩ የተገኙ ባለሙያዎች እንዲህ ያለው አግላይ አካሄድ በረቂቅ አዋጁ ላይ እምነት እንዳይጣል ያደርጋል የሚል ስጋታቸውን ለ"መሠረት ሚዲያ" ገልጸዋል። አዋጁ በቀጥታ የሚነካው ጋዜጠኞችን ሆኖ ሳለ፣ የውይይቱ ሂደት ራሱ የመረጃ መብት ጥሰት የታየበት መሆኑ አዋጁ ወደፊት በተግባር ሲተርጎም ሊያጋጥመው የሚችለውን ፈተና አመላካች ነው ተብሏል። በአጠቃላይ የመረጃ ነፃነት አዋጅ ከህዝብ ተደብቆ መወያየቱ፣ የኢትዮጵያ የመረጃ ነፃነት ጉዞ አሁንም "ከወረቀት እና ከንግግር" ባለፈ በተግባር እጅግ ፈታኝ እንደሆነ የሚያሳይ ሆኗል።