በጅማ ዞን የጎማ 2 የምርጫ ክልል የብልጽግና ፓርቲ ዕጩዎቹን በይፋ ያስተዋወቀ ሲሆን፤ በክልሉ ያለው ፖለቲካዊ እንቅስቃሴም ከፍተኛ ሙቀት ታይቶበታል። ፓርቲው በከፍተኛ ድምቀት ባከናወነው በዚህ የምረጡኝ ቅስቀሳ መርሃ-ግብር፤ በዋናነት ለሕዝብ ተወካዮች ምክር ቤት ዕጩ ሆነው የቀረቡት ጠቅላይ ሚኒስትር ዐቢይ አህመድ (ዶ/ር) መሆናቸው ልዩ ትኩረት እንዲያገኝ አድርጎታል።

በዕጩ ማስተዋወቂያ መርሃ ግብሩ ላይ የኦሮሚያ ብልጽግና ፓርቲ ቅርንጫፍ የፖለቲካ ዘርፍና አቅም ግንባታ ኃላፊ አቶ ነመራ ቡሊ እና የጅማ ዞን አስተዳዳሪ አቶ ቲጃኒ ናስርን ጨምሮ ሌሎች ከፍተኛ የሥራ ኃላፊዎች ተገኝተዋል። የከፍተኛ አመራሮቹ በቦታው መገኘት ፓርቲው ለዚህ የምርጫ ክልል የሰጠውን ስትራቴጂያዊ ክብደት የሚያሳይ እንደሆነ ተገልጿል።

አቶ ነመራ ቡሊ ለተሰበሰበው ደጋፊ ባስተላለፉት መልዕክት፤ ብልጽግና ፓርቲ "የኢትዮጵያን ከፍታ በተግባር እያሳየ ያለ ፓርቲ" መሆኑን ገልጸዋል። ፓርቲውን መምረጥ የሀገርን ልዕልና ከማረጋገጥ ጋር ቀጥተኛ ግንኙነት እንዳለው የጠቀሱት ኃላፊው፤ "ብልጽግናን መምረጥ የኢትዮጵያን ልዕልና ማረጋገጥ ነው" ሲሉ የምርጫውን ፋይዳ አስረድተዋል።

የጅማ ዞን አስተዳዳሪ አቶ ቲጃኒ ናስር በበኩላቸው፤ በጎማ ወረዳ እየተከናወኑ ያሉ ግዙፍ ፕሮጀክቶች የሕዝቡን የኑሮ ደረጃ እየቀየሩ መሆኑን ጠቁመዋል። የጎማ 2 ምርጫ ክልል መራጮች "የኢትዮጵያ ብልጽግና መሐንዲስ" የተባሉትን ጠቅላይ ሚኒስትር ዐቢይ አህመድን የመምረጥ ዕድል በማግኘታቸው "እንኳን ደስ አላችሁ" በማለት የቅስቀሳ ንግግራቸውን አድርገዋል።

በዚህ የምርጫ ክልል ጠቅላይ ሚኒስትሩ ለፌዴራል የሕዝብ ተወካዮች ምክር ቤት ዕጩ ሆነው ሲቀርቡ፤ ለክልል ምክር ቤት ደግሞ አቶ ፉዓድ ራያ አባጊሳ፣ ወይዘሮ ኢፍቱ መሃመድ አብዱ እና አቶ ነዚፍ መሃመድ አሚን ሼኢሳ በዕጩነት ቀርበዋል።

ይህ በጅማ የተደረገው የቅስቀሳ መርሃ-ግብር፤ ብልጽግና ፓርቲ የብሔራዊ አመራር ተቀባይነትን በአካባቢው ከተከናወኑ የልማት ሥራዎች ጋር በማቀናጀት ለመቅረብ እያደረገ ያለውን ጥረት የሚያሳይ ነው። ምርጫው እየተቃረበ ሲመጣ፤ የጠቅላይ ሚኒስትሩ የትውልድ ስፍራ በሆነው በዚህ ክልል የሚደረገው ፉክክር የፓርቲውን ሕዝባዊ ድጋፍ ለመመዘን እንደ ትልቅ መፈተሻ እንደሚወሰድ ይጠበቃል። ለጎማ መራጮች የቀረበው ምርጫም ግልጽ ነው፤ አሁን ያለውን የልማት ጉዞ በአገሪቱ ከፍተኛ የሥራ አስፈጻሚ ቀጥተኛ ውክልና መቀጠል።